Psalmorum

Psalmus CIX

  1. I

    Psalmus David. Dixit Dominus Domino meo : Sede a dextris meis, donec ponam inimicos tuos scabellum pedum tuorum.

  2. II

    Virgam virtutis tuæ emittet Dominus ex Sion : dominare in medio inimicorum tuorum.

  3. III

    Tecum principium in die virtutis tuæ in splendoribus sanctorum : ex utero, ante luciferum, genui te.

  4. IV

    Juravit Dominus, et non pœnitebit eum : Tu es sacerdos in æternum secundum ordinem Melchisedech.

  5. V

    Dominus a dextris tuis ; confregit in die iræ suæ reges.

  6. VI

    Judicabit in nationibus, implebit ruinas ; conquassabit capita in terra multorum.

  7. VII

    De torrente in via bibet ; propterea exaltabit caput.