Psalmorum

Psalmus CVII

  1. I

    Canticum Psalmi, ipsi David.

  2. II

    Paratum cor meum, Deus, paratum cor meum ; cantabo, et psallam in gloria mea.

  3. III

    Exsurge, gloria mea ; exsurge, psalterium et cithara ; exsurgam diluculo.

  4. IV

    Confitebor tibi in populis, Domine, et psallam tibi in nationibus :

  5. V

    quia magna est super cælos misericordia tua, et usque ad nubes veritas tua.

  6. VI

    Exaltare super cælos, Deus, et super omnem terram gloria tua :

  7. VII

    ut liberentur dilecti tui. Salvum fac dextera tua, et exaudi me.

  8. VIII

    Deus locutus est in sancto suo : Exsultabo, et dividam Sichimam ; et convallem tabernaculorum dimetiar.

  9. IX

    Meus est Galaad, et meus est Manasses, et Ephraim susceptio capitis mei. Juda rex meus ;

  10. X

    Moab lebes spei meæ : in Idumæam extendam calceamentum meum ; mihi alienigenæ amici facti sunt.

  11. XI

    Quis deducet me in civitatem munitam ? quis deducet me usque in Idumæam ?

  12. XII

    nonne tu, Deus, qui repulisti nos ? et non exibis, Deus, in virtutibus nostris ?

  13. XIII

    Da nobis auxilium de tribulatione, quia vana salus hominis.

  14. XIV

    In Deo faciemus virtutem ; et ipse ad nihilum deducet inimicos nostros.