Psalmorum

Psalmus CIV

  1. I

    Alleluja. Confitemini Domino, et invocate nomen ejus ; annuntiate inter gentes opera ejus.

  2. II

    Cantate ei, et psallite ei ; narrate omnia mirabilia ejus.

  3. III

    Laudamini in nomine sancto ejus ; lætetur cor quærentium Dominum.

  4. IV

    Quærite Dominum, et confirmamini ; quærite faciem ejus semper.

  5. V

    Mementote mirabilium ejus quæ fecit ; prodigia ejus, et judicia oris ejus :

  6. VI

    semen Abraham servi ejus ; filii Jacob electi ejus.

  7. VII

    Ipse Dominus Deus noster ; in universa terra judicia ejus.

  8. VIII

    Memor fuit in sæculum testamenti sui ; verbi quod mandavit in mille generationes :

  9. IX

    quod disposuit ad Abraham, et juramenti sui ad Isaac :

  10. X

    et statuit illud Jacob in præceptum, et Israël in testamentum æternum,

  11. XI

    dicens : Tibi dabo terram Chanaan, funiculum hæreditatis vestræ :

  12. XII

    cum essent numero brevi, paucissimi, et incolæ ejus.

  13. XIII

    Et pertransierunt de gente in gentem, et de regno ad populum alterum.

  14. XIV

    Non reliquit hominem nocere eis : et corripuit pro eis reges.

  15. XV

    Nolite tangere christos meos, et in prophetis meis nolite malignari.

  16. XVI

    Et vocavit famem super terram, et omne firmamentum panis contrivit.

  17. XVII

    Misit ante eos virum : in servum venundatus est, Joseph.

  18. XVIII

    Humiliaverunt in compedibus pedes ejus ; ferrum pertransiit animam ejus :

  19. XIX

    donec veniret verbum ejus. Eloquium Domini inflammavit eum.

  20. XX

    Misit rex, et solvit eum ; princeps populorum, et dimisit eum.

  21. XXI

    Constituit eum dominum domus suæ, et principem omnis possessionis suæ :

  22. XXII

    ut erudiret principes ejus sicut semetipsum, et senes ejus prudentiam doceret.

  23. XXIII

    Et intravit Israël in Ægyptum, et Jacob accola fuit in terra Cham.

  24. XXIV

    Et auxit populum suum vehementer, et firmavit eum super inimicos ejus.

  25. XXV

    Convertit cor eorum, ut odirent populum ejus, et dolum facerent in servos ejus.

  26. XXVI

    Misit Moysen servum suum ; Aaron quem elegit ipsum.

  27. XXVII

    Posuit in eis verba signorum suorum, et prodigiorum in terra Cham.

  28. XXVIII

    Misit tenebras, et obscuravit ; et non exacerbavit sermones suos.

  29. XXIX

    Convertit aquas eorum in sanguinem, et occidit pisces eorum.

  30. XXX

    Edidit terra eorum ranas in penetralibus regum ipsorum.

  31. XXXI

    Dixit, et venit cœnomyia et ciniphes in omnibus finibus eorum.

  32. XXXII

    Posuit pluvias eorum grandinem : ignem comburentem in terra ipsorum.

  33. XXXIII

    Et percussit vineas eorum, et ficulneas eorum, et contrivit lignum finium eorum.

  34. XXXIV

    Dixit, et venit locusta, et bruchus cujus non erat numerus :

  35. XXXV

    et comedit omne fœnum in terra eorum, et comedit omnem fructum terræ eorum.

  36. XXXVI

    Et percussit omne primogenitum in terra eorum, primitias omnis laboris eorum.

  37. XXXVII

    Et eduxit eos cum argento et auro, et non erat in tribubus eorum infirmus.

  38. XXXVIII

    Lætata est Ægyptus in profectione eorum, quia incubuit timor eorum super eos.

  39. XXXIX

    Expandit nubem in protectionem eorum, et ignem ut luceret eis per noctem.

  40. XL

    Petierunt, et venit coturnix, et pane cæli saturavit eos.

  41. XLI

    Dirupit petram, et fluxerunt aquæ : abierunt in sicco flumina.

  42. XLII

    Quoniam memor fuit verbi sancti sui, quod habuit ad Abraham puerum suum.

  43. XLIII

    Et eduxit populum suum in exsultatione, et electos suos in lætitia.

  44. XLIV

    Et dedit illis regiones gentium, et labores populorum possederunt :

  45. XLV

    ut custodiant justificationes ejus, et legem ejus requirant.