Lamentationes

Caput V

  1. I

    Recordare, Domine, quid acciderit nobis ; intuere et respice opprobrium nostrum.

  2. II

    Hæreditas nostra versa est ad alienos, domus nostræ ad extraneos.

  3. III

    Pupilli facti sumus absque patre, matres nostræ quasi viduæ.

  4. IV

    Aquam nostram pecunia bibimus ; ligna nostra pretio comparavimus.

  5. V

    Cervicibus nostris minabamur, lassis non dabatur requies.

  6. VI

    Ægypto dedimus manum et Assyriis, ut saturaremur pane.

  7. VII

    Patres nostri peccaverunt, et non sunt : et nos iniquitates eorum portavimus.

  8. VIII

    Servi dominati sunt nostri : non fuit qui redimeret de manu eorum.

  9. IX

    In animabus nostris afferebamus panem nobis, a facie gladii in deserto.

  10. X

    Pellis nostra quasi clibanus exusta est, a facie tempestatum famis.

  11. XI

    Mulieres in Sion humiliaverunt, et virgines in civitatibus Juda.

  12. XII

    Principes manu suspensi sunt ; facies senum non erubuerunt.

  13. XIII

    Adolescentibus impudice abusi sunt, et pueri in ligno corruerunt.

  14. XIV

    Senes defecerunt de portis, juvenes de choro psallentium.

  15. XV

    Defecit gaudium cordis nostri ; versus est in luctum chorus noster.

  16. XVI

    Cecidit corona capitis nostri : væ nobis, quia peccavimus !

  17. XVII

    Propterea mœstum factum est cor nostrum ; ideo contenebrati sunt oculi nostri,

  18. XVIII

    propter montem Sion quia disperiit ; vulpes ambulaverunt in eo.

  19. XIX

    Tu autem, Domine, in æternum permanebis, solium tuum in generationem et generationem.

  20. XX

    Quare in perpetuum oblivisceris nostri, derelinques nos in longitudine dierum ?

  21. XXI

    Converte nos, Domine, ad te, et convertemur ; innova dies nostros, sicut a principio.

  22. XXII

    Sed projiciens repulisti nos : iratus es contra nos vehementer.