Iudith

Caput II

  1. I

    Anno tertiodecimo Nabuchodonosor regis, vigesima et secunda die mensis primi, factum est verbum in domo Nabuchodonosor regis Assyriorum ut defenderet se.

  2. II

    Vocavitque omnes majores natu, omnesque duces et bellatores suos, et habuit cum eis mysterium consilii sui :

  3. III

    dixitque cogitationem suam in eo esse, ut omnem terram suo subjugaret imperio.

  4. IV

    Quod dictum cum placuisset omnibus, vocavit Nabuchodonosor rex Holofernem principem militiæ suæ,

  5. V

    et dixit ei : Egredere adversus omne regnum occidentis, et contra eos præcipue, qui contempserunt imperium meum.

  6. VI

    Non parcet oculus tuus ulli regno, omnemque urbem munitam subjugabis mihi.

  7. VII

    Tunc Holofernes vocavit duces et magistratus virtutis Assyriorum, et dinumeravit viros in expeditionem sicut præcepit ei rex, centum viginti millia peditum pugnatorum, et equitum sagittariorum duodecim millia.

  8. VIII

    Omnemque expeditionem suam fecit præire in multitudine innumerabilium camelorum, cum his quæ exercitibus sufficerent copiose, boum quoque armenta, gregesque ovium, quorum non erat numerus.

  9. IX

    Frumentum ex omni Syria in transitu suo parari constituit.

  10. X

    Aurum vero et argentum de domo regis assumpsit multum nimis.

  11. XI

    Et profectus est ipse, et omnis exercitus cum quadrigis, et equitibus, et sagittariis : qui cooperuerunt faciem terræ sicut locustæ.

  12. XII

    Cumque pertransisset fines Assyriorum, venit ad magnos montes Ange, qui sunt a sinistro Ciliciæ : ascenditque omnia castella eorum, et obtinuit omnem munitionem.

  13. XIII

    Effregit autem civitatem opinatissimam Melothi, prædavitque omnes filios Tharsis et filios Ismaël qui erant contra faciem deserti, et ad austrum terræ Cellon.

  14. XIV

    Et transivit Euphraten, et venit in Mesopotamiam : et fregit omnes civitates excelsas quæ erant ibi, a torrente Mambre usquequo perveniatur ad mare :

  15. XV

    et occupavit terminos ejus, a Cilicia usque ad fines Japheth qui sunt ad austrum.

  16. XVI

    Abduxitque omnes filios Madian, et prædavit omnem locupletationem eorum, omnesque resistentes sibi occidit in ore gladii.

  17. XVII

    Et post hæc descendit in campos Damasci in diebus messis, et succendit omnia sata, omnesque arbores, et vineas fecit incidi :

  18. XVIII

    et cecidit timor illius super omnes inhabitantes terram.