Iosue

Caput XXI

  1. I

    Accesseruntque principes familiarum Levi ad Eleazarum sacerdotem, et Josue filium Nun, et ad duces cognationum per singulas tribus filiorum Israël :

  2. II

    locutique sunt ad eos in Silo terræ Chanaan, atque dixerunt : Dominus præcepit per manum Moysi, ut darentur nobis urbes ad habitandum, et suburbana earum ad alenda jumenta.

  3. III

    Dederuntque filii Israël de possessionibus suis juxta imperium Domini, civitates et suburbana earum.

  4. IV

    Egressaque est sors in familiam Caath filiorum Aaron sacerdotis, de tribubus Juda, et Simeon, et Benjamin, civitates tredecim :

  5. V

    et reliquis filiorum Caath, id est Levitis, qui superfuerant, de tribubus Ephraim, et Dan, et dimidia tribu Manasse, civitates decem.

  6. VI

    Porro filiis Gerson egressa est sors, ut acciperent de tribubus Issachar et Aser et Nephthali, dimidiaque tribu Manasse in Basan, civitates numero tredecim.

  7. VII

    Et filiis Merari per cognationes suas de tribubus Ruben et Gad et Zabulon urbes duodecim.

  8. VIII

    Dederuntque filii Israël Levitis civitates et suburbana earum, sicut præcepit Dominus per manum Moysi, singulis sorte tribuentes.

  9. IX

    De tribubus filiorum Juda et Simeon dedit Josue civitates, quarum ista sunt nomina,

  10. X

    filiis Aaron per familias Caath Levitici generis (prima enim sors illis egressa est),

  11. XI

    Cariatharbe patris Enac, quæ vocatur Hebron, in monte Juda, et suburbana ejus per circuitum.

  12. XII

    Agros vero et villas ejus dederat Caleb filio Jephone ad possidendum.

  13. XIII

    Dedit ergo filiis Aaron sacerdotis Hebron confugii civitatem, ac suburbana ejus : et Lobnam cum suburbanis suis :

  14. XIV

    et Jether, et Esthemo,

  15. XV

    et Holon, et Dabir,

  16. XVI

    et Ain, et Jeta, et Bethsames, cum suburbanis suis : civitates novem de tribubus, ut dictum est, duabus.

  17. XVII

    De tribu autem filiorum Benjamin, Gabaon, et Gabæ,

  18. XVIII

    et Anathoth et Almon, cum suburbanis suis : civitates quatuor.

  19. XIX

    Omnes simul civitates filiorum Aaron sacerdotis, tredecim, cum suburbanis suis.

  20. XX

    Reliquis vero per familias filiorum Caath Levitici generis, hæc est data possessio.

  21. XXI

    De tribu Ephraim urbes confugii, Sichem cum suburbanis suis in monte Ephraim, et Gazer

  22. XXII

    et Cibsaim et Bethoron, cum suburbanis suis, civitates quatuor.

  23. XXIII

    De tribu quoque Dan, Eltheco et Gabathon,

  24. XXIV

    et Ajalon et Gethremmon, cum suburbanis suis, civitates quatuor.

  25. XXV

    Porro de dimidia tribu Manasse, Thanach et Gethremmon, cum suburbanis suis, civitates duæ.

  26. XXVI

    Omnes civitates decem, et suburbana earum, datæ sunt filiis Caath inferioris gradus.

  27. XXVII

    Filiis quoque Gerson Levitici generis dedit de dimidia tribu Manasse confugii civitates, Gaulon in Basan, et Bosram, cum suburbanis suis, civitates duas.

  28. XXVIII

    Porro de tribu Issachar, Cesion, et Dabereth,

  29. XXIX

    et Jaramoth, et Engannim, cum suburbanis suis, civitates quatuor.

  30. XXX

    De tribu autem Aser, Masal et Abdon,

  31. XXXI

    et Helcath, et Rohob, cum suburbanis suis, civitates quatuor.

  32. XXXII

    De tribu quoque Nephthali civitates confugii, Cedes in Galilæa, et Hammoth Dor, et Carthan, cum suburbanis suis, civitates tres.

  33. XXXIII

    Omnes urbes familiarum Gerson, tredecim, cum suburbanis suis.

  34. XXXIV

    Filiis autem Merari Levitis inferioris gradus per familias suas data est de tribu Zabulon, Jecnam, et Cartha

  35. XXXV

    et Damna et Naalol, civitates quatuor cum suburbanis suis.

  36. XXXVI

    De tribu Ruben ultra Jordanem contra Jericho civitates refugii, Bosor in solitudine, Misor et Jaser et Jethson et Mephaath, civitates quatuor cum suburbanis suis.

  37. XXXVII

    De tribu Gad civitates confugii, Ramoth in Galaad, et Manaim et Hesebon et Jazer, civitates quatuor cum suburbanis suis.

  38. XXXVIII

    Omnes urbes filiorum Merari per familias et cognationes suas, duodecim.

  39. XXXIX

    Itaque civitates universæ Levitarum in medio possessionis filiorum Israël fuerunt quadraginta octo

  40. XL

    cum suburbanis suis, singulæ per familias distributæ.

  41. XLI

    Deditque Dominus Deus Israëli omnem terram, quam traditurum se patribus eorum juraverat : et possederunt illam, atque habitaverunt in ea.

  42. XLII

    Dataque est ab eo pax in omnes per circuitum nationes : nullusque eis hostium resistere ausus est, sed cuncti in eorum ditionem redacti sunt.

  43. XLIII

    Ne unum quidem verbum, quod illis præstiturum se esse promiserat, irritum fuit, sed rebus expleta sunt omnia.