Iob

Caput VIII

  1. I

    Respondens autem Baldad Suhites, dixit :

  2. II

    Usquequo loqueris talia, et spiritus multiplex sermones oris tui ?

  3. III

    Numquid Deus supplantat judicium ? aut Omnipotens subvertit quod justum est ?

  4. IV

    Etiam si filii tui peccaverunt ei, et dimisit eos in manu iniquitatis suæ :

  5. V

    tu tamen si diluculo consurrexeris ad Deum, et Omnipotentem fueris deprecatus ;

  6. VI

    si mundus et rectus incesseris : statim evigilabit ad te, et pacatum reddet habitaculum justitiæ tuæ,

  7. VII

    in tantum ut si priora tua fuerint parva, et novissima tua multiplicentur nimis.

  8. VIII

    Interroga enim generationem pristinam, et diligenter investiga patrum memoriam

  9. IX

    (hesterni quippe sumus, et ignoramus, quoniam sicut umbra dies nostri sunt super terram),

  10. X

    et ipsi docebunt te, loquentur tibi, et de corde suo proferent eloquia.

  11. XI

    Numquid virere potest scirpus absque humore ? aut crescere carectum sine aqua ?

  12. XII

    Cum adhuc sit in flore, nec carpatur manu, ante omnes herbas arescit.

  13. XIII

    Sic viæ omnium qui obliviscuntur Deum, et spes hypocritæ peribit.

  14. XIV

    Non ei placebit vecordia sua, et sicut tela aranearum fiducia ejus.

  15. XV

    Innitetur super domum suam, et non stabit ; fulciet eam, et non consurget.

  16. XVI

    Humectus videtur antequam veniat sol, et in ortu suo germen ejus egredietur.

  17. XVII

    Super acervum petrarum radices ejus densabuntur, et inter lapides commorabitur.

  18. XVIII

    Si absorbuerit eum de loco suo, negabit eum, et dicet : Non novi te.

  19. XIX

    Hæc est enim lætitia viæ ejus, ut rursum de terra alii germinentur.

  20. XX

    Deus non projiciet simplicem, nec porriget manum malignis,

  21. XXI

    donec impleatur risu os tuum, et labia tua jubilo.

  22. XXII

    Qui oderunt te induentur confusione, et tabernaculum impiorum non subsistet.