Iob

Caput XXXVIII

  1. I

    Respondens autem Dominus Job de turbine, dixit :

  2. II

    Quis est iste involvens sententias sermonibus imperitis ?

  3. III

    Accinge sicut vir lumbos tuos : interrogabo te, et responde mihi.

  4. IV

    Ubi eras quando ponebam fundamenta terræ ? indica mihi, si habes intelligentiam.

  5. V

    Quis posuit mensuras ejus, si nosti ? vel quis tetendit super eam lineam ?

  6. VI

    Super quo bases illius solidatæ sunt ? aut quis demisit lapidem angularem ejus,

  7. VII

    cum me laudarent simul astra matutina, et jubilarent omnes filii Dei ?

  8. VIII

    Quis conclusit ostiis mare, quando erumpebat quasi de vulva procedens ;

  9. IX

    cum ponerem nubem vestimentum ejus, et caligine illud quasi pannis infantiæ obvolverem ?

  10. X

    Circumdedi illud terminis meis, et posui vectem et ostia,

  11. XI

    et dixi : Usque huc venies, et non procedes amplius, et hic confringes tumentes fluctus tuos.

  12. XII

    Numquid post ortum tuum præcepisti diluculo, et ostendisti auroræ locum suum ?

  13. XIII

    Et tenuisti concutiens extrema terræ, et excussisti impios ex ea ?

  14. XIV

    Restituetur ut lutum signaculum, et stabit sicut vestimentum :

  15. XV

    auferetur ab impiis lux sua, et brachium excelsum confringetur.

  16. XVI

    Numquid ingressus es profunda maris, et in novissimis abyssi deambulasti ?

  17. XVII

    Numquid apertæ sunt tibi portæ mortis, et ostia tenebrosa vidisti ?

  18. XVIII

    Numquid considerasti latitudinem terræ ? indica mihi, si nosti, omnia :

  19. XIX

    in qua via lux habitet, et tenebrarum quis locus sit :

  20. XX

    ut ducas unumquodque ad terminos suos, et intelligas semitas domus ejus.

  21. XXI

    Sciebas tunc quod nasciturus esses, et numerum dierum tuorum noveras ?

  22. XXII

    Numquid ingressus es thesauros nivis, aut thesauros grandinis aspexisti,

  23. XXIII

    quæ præparavi in tempus hostis, in diem pugnæ et belli ?

  24. XXIV

    Per quam viam spargitur lux, dividitur æstus super terram ?

  25. XXV

    Quis dedit vehementissimo imbri cursum, et viam sonantis tonitrui,

  26. XXVI

    ut plueret super terram absque homine in deserto, ubi nullus mortalium commoratur ;

  27. XXVII

    ut impleret inviam et desolatam, et produceret herbas virentes ?

  28. XXVIII

    Quis est pluviæ pater ? vel quis genuit stillas roris ?

  29. XXIX

    De cujus utero egressa est glacies ? et gelu de cælo quis genuit ?

  30. XXX

    In similitudinem lapidis aquæ durantur, et superficies abyssi constringitur.

  31. XXXI

    Numquid conjungere valebis micantes stellas Pleiadas, aut gyrum Arcturi poteris dissipare ?

  32. XXXII

    Numquid producis luciferum in tempore suo, et vesperum super filios terræ consurgere facis ?

  33. XXXIII

    Numquid nosti ordinem cæli, et pones rationem ejus in terra ?

  34. XXXIV

    Numquid elevabis in nebula vocem tuam, et impetus aquarum operiet te ?

  35. XXXV

    Numquid mittes fulgura, et ibunt, et revertentia dicent tibi : Adsumus ?

  36. XXXVI

    Quis posuit in visceribus hominis sapientiam ? vel quis dedit gallo intelligentiam ?

  37. XXXVII

    Quis enarrabit cælorum rationem ? et concentum cæli quis dormire faciet ?

  38. XXXVIII

    Quando fundebatur pulvis in terra, et glebæ compingebantur ?

  39. XXXIX

    Numquid capies leænæ prædam, et animam catulorum ejus implebis,

  40. XL

    quando cubant in antris, et in specubus insidiantur ?

  41. XLI

    Quis præparat corvo escam suam, quando pulli ejus clamant ad Deum, vagantes, eo quod non habeant cibos ?