Iob

Caput XVIII

  1. I

    Respondens autem Baldad Suhites, dixit :

  2. II

    Usque ad quem finem verba jactabitis ? intelligite prius, et sic loquamur.

  3. III

    Quare reputati sumus ut jumenta, et sorduimus coram vobis ?

  4. IV

    Qui perdis animam tuam in furore tuo, numquid propter te derelinquetur terra, et transferentur rupes de loco suo ?

  5. V

    Nonne lux impii extinguetur, nec splendebit flamma ignis ejus ?

  6. VI

    Lux obtenebrescet in tabernaculo illius, et lucerna quæ super eum est extinguetur.

  7. VII

    Arctabuntur gressus virtutis ejus, et præcipitabit eum consilium suum.

  8. VIII

    Immisit enim in rete pedes suos, et in maculis ejus ambulat.

  9. IX

    Tenebitur planta illius laqueo, et exardescet contra eum sitis.

  10. X

    Abscondita est in terra pedica ejus, et decipula illius super semitam.

  11. XI

    Undique terrebunt eum formidines, et involvent pedes ejus.

  12. XII

    Attenuetur fame robur ejus, et inedia invadat costas illius.

  13. XIII

    Devoret pulchritudinem cutis ejus ; consumat brachia illius primogenita mors.

  14. XIV

    Avellatur de tabernaculo suo fiducia ejus, et calcet super eum, quasi rex, interitus.

  15. XV

    Habitent in tabernaculo illius socii ejus qui non est ; aspergatur in tabernaculo ejus sulphur.

  16. XVI

    Deorsum radices ejus siccentur : sursum autem atteratur messis ejus.

  17. XVII

    Memoria illius pereat de terra, et non celebretur nomen ejus in plateis.

  18. XVIII

    Expellet eum de luce in tenebras, et de orbe transferet eum.

  19. XIX

    Non erit semen ejus, neque progenies in populo suo, nec ullæ reliquiæ in regionibus ejus.

  20. XX

    In die ejus stupebunt novissimi, et primos invadet horror.

  21. XXI

    Hæc sunt ergo tabernacula iniqui, et iste locus ejus qui ignorat Deum.