Epistula ad Hebræos

ad Hebræos

Caput I

  1. I

    Multifariam, multisque modis olim Deus loquens patribus in prophetis :

  2. II

    novissime, diebus istis locutus est nobis in Filio, quem constituit hæredem universorum, per quem fecit et sæcula :

  3. III

    qui cum sit splendor gloriæ, et figura substantiæ ejus, portansque omnia verbo virtutis suæ, purgationem peccatorum faciens, sedet ad dexteram majestatis in excelsis :

  4. IV

    tanto melior angelis effectus, quanto differentius præ illis nomen hæreditavit.

  5. V

    Cui enim dixit aliquando angelorum : Filius meus es tu, ego hodie genui te ? Et rursum : Ego ero illi in patrem, et ipse erit mihi in filium ?

  6. VI

    Et cum iterum introducit primogenitum in orbem terræ, dicit : Et adorent eum omnes angeli Dei.

  7. VII

    Et ad angelos quidem dicit : Qui facit angelos suos spiritus, et ministros suos flammam ignis.

  8. VIII

    Ad Filium autem : Thronus tuus Deus in sæculum sæculi : virga æquitatis, virga regni tui.

  9. IX

    Dilexisti justitiam, et odisti iniquitatem : propterea unxit te Deus, Deus tuus, oleo exsultationis præ participibus tuis.

  10. X

    Et : Tu in principio, Domine, terram fundasti : et opera manuum tuarum sunt cæli.

  11. XI

    Ipsi peribunt, tu autem permanebis, et omnes ut vestimentum veterascent :

  12. XII

    et velut amictum mutabis eos, et mutabuntur : tu autem idem ipse es, et anni tui non deficient.

  13. XIII

    Ad quem autem angelorum dixit aliquando : Sede a dextris meis, quoadusque ponam inimicos tuos scabellum pedum tuorum ?

  14. XIV

    Nonne omnes sunt administratorii spiritus, in ministerium missi propter eos, qui hæreditatem capient salutis ?