ad Galatas

Caput V

  1. I

    State, et nolite iterum jugo servitutis contineri.

  2. II

    Ecce ego Paulus dico vobis : quoniam si circumcidamini, Christus vobis nihil proderit.

  3. III

    Testificor autem rursus omni homini circumcidenti se, quoniam debitor est universæ legis faciendæ.

  4. IV

    Evacuati estis a Christo, qui in lege justificamini : a gratia excidistis.

  5. V

    Nos enim spiritu ex fide, spem justitiæ exspectamus.

  6. VI

    Nam in Christo Jesu neque circumcisio aliquid valet, neque præputium : sed fides, quæ per caritatem operatur.

  7. VII

    Currebatis bene : quis vos impedivit veritati non obedire ?

  8. VIII

    persuasio hæc non est ex eo, qui vocat vos.

  9. IX

    Modicum fermentum totam massam corrumpit.

  10. X

    Ego confido in vobis in Domino, quod nihil aliud sapietis : qui autem conturbat vos, portabit judicium, quicumque est ille.

  11. XI

    Ego autem, fratres, si circumcisionem adhuc prædico : quid adhuc persecutionem patior ? ergo evacuatum est scandalum crucis.

  12. XII

    Utinam et abscindantur qui vos conturbant.

  13. XIII

    Vos enim in libertatem vocati estis, fratres : tantum ne libertatem in occasionem detis carnis, sed per caritatem Spiritus servite invicem.

  14. XIV

    Omnis enim lex in uno sermone impletur : Diliges proximum tuum sicut teipsum.

  15. XV

    Quod si invicem mordetis, et comeditis : videte ne ab invicem consumamini.

  16. XVI

    Dico autem : Spiritu ambulate, et desideria carnis non perficietis.

  17. XVII

    Caro enim concupiscit adversus spiritum, spiritus autem adversus carnem : hæc enim sibi invicem adversantur, ut non quæcumque vultis, illa faciatis.

  18. XVIII

    Quod si Spiritu ducimini, non estis sub lege.

  19. XIX

    Manifesta sunt autem opera carnis, quæ sunt fornicatio, immunditia, impudicitia, luxuria,

  20. XX

    idolorum servitus, veneficia, inimicitiæ, contentiones, æmulationes, iræ, rixæ, dissensiones, sectæ,

  21. XXI

    invidiæ, homicidia, ebrietates, comessationes, et his similia, quæ prædico vobis, sicut prædixi : quoniam qui talia agunt, regnum Dei non consequentur.

  22. XXII

    Fructus autem Spiritus est caritas, gaudium, pax, patientia, benignitas, bonitas, longanimitas,

  23. XXIII

    mansuetudo, fides, modestia, continentia, castitas. Adversus hujusmodi non est lex.

  24. XXIV

    Qui autem sunt Christi, carnem suam crucifixerunt cum vitiis et concupiscentiis.

  25. XXV

    Si Spiritu vivimus, Spiritu et ambulemus.

  26. XXVI

    Non efficiamur inanis gloriæ cupidi, invicem provocantes, invicem invidentes.