Exodus

Caput XXXI

  1. I

    Locutusque est Dominus ad Moysen, dicens :

  2. II

    Ecce, vocavi ex nomine Beseleel filium Uri filii Hur de tribu Juda,

  3. III

    et implevi spiritu Dei, sapientia, et intelligentia et scientia in omni opere,

  4. IV

    ad excogitandum quidquid fabrefieri potest ex auro, et argento, et ære,

  5. V

    marmore, et gemmis, et diversitate lignorum.

  6. VI

    Dedique ei socium Ooliab filium Achisamech de tribu Dan. Et in corde omnis eruditi posui sapientiam : ut faciant cuncta quæ præcepi tibi,

  7. VII

    tabernaculum fœderis, et arcam testimonii, et propitiatorium, quod super eam est, et cuncta vasa tabernaculi,

  8. VIII

    mensamque et vasa ejus, candelabrum purissimum cum vasis suis, et altaris thymiamatis,

  9. IX

    et holocausti, et omnia vasa eorum, labrum cum basi sua,

  10. X

    vestes sanctas in ministerio Aaron sacerdoti, et filiis ejus, ut fungantur officio suo in sacris :

  11. XI

    oleum unctionis, et thymiama aromatum in sanctuario, omnia quæ præcepi tibi, facient.

  12. XII

    Et locutus est Dominus ad Moysen, dicens :

  13. XIII

    Loquere filiis Israël, et dices ad eos : Videte ut sabbatum meum custodiatis : quia signum est inter me et vos in generationibus vestris : ut sciatis quia ego Dominus, qui sanctifico vos.

  14. XIV

    Custodite sabbatum meum, sanctum est enim vobis : qui polluerit illud, morte morietur ; qui fecerit in eo opus, peribit anima illius de medio populi sui.

  15. XV

    Sex diebus facietis opus : in die septimo sabbatum est, requies sancta Domino ; omnis qui fecerit opus in hac die, morietur.

  16. XVI

    Custodiant filii Israël sabbatum, et celebrent illud in generationibus suis. Pactum est sempiternum

  17. XVII

    inter me et filios Israël, signumque perpetuum ; sex enim diebus fecit Dominus cælum et terram, et in septimo ab opere cessavit.

  18. XVIII

    Deditque Dominus Moysi, completis hujuscemodi sermonibus in monte Sinai, duas tabulas testimonii lapideas, scriptas digito Dei.