II Paralipomenon

Caput XVII

  1. I

    Regnavit autem Josaphat filius ejus pro eo, et invaluit contra Israël.

  2. II

    Constituitque militum numeros in cunctis urbibus Juda quæ erant vallatæ muris. Præsidiaque disposuit in terra Juda, et in civitatibus Ephraim quas ceperat Asa pater ejus.

  3. III

    Et fuit Dominus cum Josaphat, quia ambulavit in viis David patris sui primis : et non speravit in Baalim,

  4. IV

    sed in Deo patris sui : et perrexit in præceptis illius, et non juxta peccata Israël.

  5. V

    Confirmavitque Dominus regnum in manu ejus, et dedit omnis Juda munera Josaphat : factæque sunt ei infinitæ divitiæ, et multa gloria.

  6. VI

    Cumque sumpsisset cor ejus audaciam propter vias Domini, etiam excelsa et lucos de Juda abstulit.

  7. VII

    Tertio autem anno regni sui misit de principibus suis Benhail, et Obdiam, et Zachariam, et Nathanaël, et Michæam, ut docerent in civitatibus Juda :

  8. VIII

    et cum eis Levitas Semeiam, et Nathaniam, et Zabadiam, Asaël quoque, et Semiramoth, et Jonathan, Adoniamque et Thobiam, et Thobadoniam Levitas, et cum eis Elisama, et Joran sacerdotes :

  9. IX

    docebantque populum in Juda, habentes librum legis Domini, et circuibant cunctas urbes Juda, atque erudiebant populum.

  10. X

    Itaque factus est pavor Domini super omnia regna terrarum quæ erant per gyrum Juda, nec audebant bellare contra Josaphat.

  11. XI

    Sed et Philisthæi Josaphat munera deferebant, et vectigal argenti : Arabes quoque adducebant pecora, arietum septem millia septingenta, et hircorum totidem.

  12. XII

    Crevit ergo Josaphat, et magnificatus est usque in sublime : atque ædificavit in Juda domos ad instar turrium, urbesque muratas.

  13. XIII

    Et multa opera paravit in urbibus Juda : viri quoque bellatores et robusti erant in Jerusalem,

  14. XIV

    quorum iste numerus per domos atque familias singulorum : in Juda principes exercitus, Ednas dux, et cum eo robustissimi viri trecenta millia.

  15. XV

    Post hunc Johanan princeps, et cum eo ducenta octoginta millia.

  16. XVI

    Post istum quoque Amasias filius Zechri, consecratus Domino, et cum eo ducenta millia virorum fortium.

  17. XVII

    Hunc sequebatur robustus ad prælia Eliada, et cum eo tenentium arcum et clypeum ducenta millia.

  18. XVIII

    Post istum etiam Jozabad, et cum eo centum octoginta millia expeditorum militum.

  19. XIX

    Hi omnes erant ad manum regis, exceptis aliis quos posuerat in urbibus muratis in universo Juda.