Epistula II Ioannis

II Ioannis

Caput I

  1. I

    Senior Electæ dominæ, et natis ejus, quos ego diligo in veritate, et non ego solus, sed et omnes qui cognoverunt veritatem,

  2. II

    propter veritatem, quæ permanet in nobis, et nobiscum erit in æternum.

  3. III

    Sit vobiscum gratia, misericordia, pax a Deo Patre, et a Christo Jesu Filio Patris in veritate, et caritate.

  4. IV

    Gavisus sum valde, quoniam inveni de filiis tuis ambulantes in veritate, sicut mandatum accepimus a Patre.

  5. V

    Et nunc rogo te domina, non tamquam mandatum novum scribens tibi, sed quod habuimus ab initio, ut diligamus alterutrum.

  6. VI

    Et hæc est caritas, ut ambulemus secundum mandata ejus. Hoc est enim mandatum, ut quemadmodum audistis ab initio, in eo ambuletis.

  7. VII

    Quoniam multi seductores exierunt in mundum, qui non confitentur Jesum Christum venisse in carnem : hic est seductor, et antichristus.

  8. VIII

    Videte vosmetipsos, ne perdatis quæ operati estis : sed ut mercedem plenam accipiatis.

  9. IX

    Omnis qui recedit, et non permanet in doctrina Christi, Deum non habet : qui permanet in doctrina, hic et Patrem et Filium habet.

  10. X

    Si quis venit ad vos, et hanc doctrinam non affert, nolite recipere eum in domum, nec Ave ei dixeritis.

  11. XI

    Qui enim dicit illi Ave, communicat operibus ejus malignis.

  12. XII

    Plura habens vobis scribere, nolui per cartam et atramentum : spero enim me futurum apud vos, et os ad os loqui : ut gaudium vestrum plenum sit.

  13. XIII

    Salutant te filii sororis tuæ Electæ.