I ad Corinthios

Caput XVI

  1. I

    De collectis autem, quæ fiunt in sanctos, sicut ordinavi ecclesiis Galatiæ, ita et vos facite.

  2. II

    Per unam sabbati unusquisque vestrum apud se seponat, recondens quod ei bene placuerit : ut non, cum venero, tunc collectæ fiant.

  3. III

    Cum autem præsens fuero, quos probaveritis per epistolas, hos mittam perferre gratiam vestram in Jerusalem.

  4. IV

    Quod si dignum fuerit ut et ego eam, mecum ibunt.

  5. V

    Veniam autem ad vos, cum Macedoniam pertransiero : nam Macedoniam pertransibo.

  6. VI

    Apud vos autem forsitan manebo, vel etiam hiemabo : ut vos me deducatis quocumque iero.

  7. VII

    Nolo enim vos modo in transitu videre, spero enim me aliquantulum temporis manere apud vos, si Dominus permiserit.

  8. VIII

    Permanebo autem Ephesi usque ad Pentecosten.

  9. IX

    Ostium enim mihi apertum est magnum, et evidens : et adversarii multi.

  10. X

    Si autem venerit Timotheus, videte ut sine timore sit apud vos : opus enim Domini operatur, sicut et ego.

  11. XI

    Ne quis ergo illum spernat : deducite autem illum in pace, ut veniat ad me : exspecto enim illum cum fratribus.

  12. XII

    De Apollo autem fratre vobis notum facio, quoniam multum rogavi eum ut veniret ad vos cum fratribus : et utique non fuit voluntas ut nunc veniret : veniet autem, cum ei vacuum fuerit.

  13. XIII

    Vigilate, state in fide, viriliter agite, et confortamini.

  14. XIV

    Omnia vestra in caritate fiant.

  15. XV

    Obsecro autem vos fratres, nostis domum Stephanæ, et Fortunati, et Achaici : quoniam sunt primitiæ Achaiæ, et in ministerium sanctorum ordinaverunt seipsos :

  16. XVI

    ut et vos subditi sitis ejusmodi, et omni cooperanti, et laboranti.

  17. XVII

    Gaudeo autem in præsentia Stephanæ, et Fortunati, et Achaici : quoniam id, quod vobis deerat, ipsi suppleverunt :

  18. XVIII

    refecerunt enim et meum spiritum, et vestrum. Cognoscite ergo qui hujusmodi sunt.

  19. XIX

    Salutant vos ecclesiæ Asiæ. Salutant vos in Domino multum, Aquila et Priscilla cum domestica sua ecclesia : apud quos et hospitor.

  20. XX

    Salutant vos omnes fratres. Salutate invicem in osculo sancto.

  21. XXI

    Salutatio, mea manu Pauli.

  22. XXII

    Si quis non amat Dominum nostrum Jesum Christum, sit anathema, Maran Atha.

  23. XXIII

    Gratia Domini nostri Jesu Christi vobiscum.

  24. XXIV

    Caritas mea cum omnibus vobis in Christo Jesu. Amen.