ad Philippenses

Caput III

  1. I

    De cetero, fratres mei, gaudete in Domino. Eadem vobis scribere, mihi quidem non pigrum, vobis autem necessarium.

  2. II

    Videte canes, videte malos operarios, videte concisionem.

  3. III

    Nos enim sumus circumcisio, qui spiritu servimus Deo, et gloriamur in Christo Jesu, et non in carne fiduciam habentes,

  4. IV

    quamquam ego habeam confidentiam et in carne. Si quis alius videtur confidere in carne, ego magis,

  5. V

    circumcisus octavo die, ex genere Israël, de tribu Benjamin, Hebræus ex Hebræis, secundum legem pharisæus,

  6. VI

    secundum æmulationem persequens Ecclesiam Dei, secundum justitiam, quæ in lege est, conversatus sine querela.

  7. VII

    Sed quæ mihi fuerunt lucra, hæc arbitratus sum propter Christum detrimenta.

  8. VIII

    Verumtamen existimo omnia detrimentum esse propter eminentem scientiam Jesu Christi Domini mei : propter quem omnia detrimentum feci, et arbitror ut stercora, ut Christum lucrifaciam,

  9. IX

    et inveniar in illo non habens meam justitiam, quæ ex lege est, sed illam, quæ ex fide est Christi Jesu : quæ ex Deo est justitia in fide,

  10. X

    ad cognoscendum illum, et virtutem resurrectionis ejus, et societatem passionum illius : configuratus morti ejus :

  11. XI

    si quo modo occurram ad resurrectionem, quæ est ex mortuis :

  12. XII

    non quod jam acceperim, aut jam perfectus sim : sequor autem, si quomodo comprehendam in quo et comprehensus sum a Christo Jesu.

  13. XIII

    Fratres, ego me non arbitror comprehendisse. Unum autem, quæ quidem retro sunt obliviscens, ad ea vero quæ sunt priora, extendens meipsum,

  14. XIV

    ad destinatum persequor, ad bravium supernæ vocationis Dei in Christo Jesu.

  15. XV

    Quicumque ergo perfecti sumus, hoc sentiamus : et si quid aliter sapitis, et hoc vobis Deus revelabit.

  16. XVI

    Verumtamen ad quod pervenimus ut idem sapiamus, et in eadem permaneamus regula.

  17. XVII

    Imitatores mei estote, fratres, et observate eos qui ita ambulant, sicut habetis formam nostram.

  18. XVIII

    Multi enim ambulant, quos sæpe dicebam vobis (nunc autem et flens dico) inimicos crucis Christi :

  19. XIX

    quorum finis interitus : quorum Deus venter est : et gloria in confusione ipsorum, qui terrena sapiunt.

  20. XX

    Nostra autem conversatio in cælis est : unde etiam Salvatorem exspectamus Dominum nostrum Jesum Christum,

  21. XXI

    qui reformabit corpus humilitatis nostræ, configuratum corpori claritatis suæ, secundum operationem, qua etiam possit subjicere sibi omnia.