Osee

Caput VI

  1. I

    In tribulatione sua mane consurgent ad me : Venite, et revertamur ad Dominum,

  2. II

    quia ipse cepit, et sanabit nos ; percutiet, et curabit nos.

  3. III

    Vivificabit nos post duos dies ; in die tertia suscitabit nos, et vivemus in conspectu ejus. Sciemus, sequemurque ut cognoscamus Dominum : quasi diluculum præparatus est egressus ejus, et veniet quasi imber nobis temporaneus et serotinus terræ.

  4. IV

    Quid faciam tibi, Ephraim ? quid faciam tibi, Juda ? misericordia vestra quasi nubes matutina, et quasi ros mane pertransiens.

  5. V

    Propter hoc dolavi in prophetis ; occidi eos in verbis oris mei : et judicia tua quasi lux egredientur.

  6. VI

    Quia misericordiam volui, et non sacrificium ; et scientiam Dei plus quam holocausta.

  7. VII

    Ipsi autem sicut Adam transgressi sunt pactum : ibi prævaricati sunt in me.

  8. VIII

    Galaad civitas operantium idolum, supplantata sanguine.

  9. IX

    Et quasi fauces virorum latronum, particeps sacerdotum, in via interficientium pergentes de Sichem : quia scelus operati sunt.

  10. X

    In domo Israël vidi horrendum : ibi fornicationes Ephraim, contaminatus est Israël.

  11. XI

    Sed et Juda, pone messem tibi, cum convertero captivitatem populi mei.