Ionæ

Caput II

  1. I

    Et præparavit Dominus piscem grandem ut deglutiret Jonam : et erat Jonas in ventre piscis tribus diebus et tribus noctibus.

  2. II

    Et oravit Jonas ad Dominum Deum suum de ventre piscis,

  3. III

    et dixit : Clamavi de tribulatione mea ad Dominum, et exaudivit me ; de ventre inferi clamavi, et exaudisti vocem meam.

  4. IV

    Et projecisti me in profundum in corde maris, et flumen circumdedit me : omnes gurgites tui, et fluctus tui super me transierunt.

  5. V

    Et ego dixi : Abjectus sum a conspectu oculorum tuorum ; verumtamen rursus videbo templum sanctum tuum.

  6. VI

    Circumdederunt me aquæ usque ad animam : abyssus vallavit me, pelagus operuit caput meum.

  7. VII

    Ad extrema montium descendi ; terræ vectes concluserunt me in æternum : et sublevabis de corruptione vitam meam, Domine Deus meus.

  8. VIII

    Cum angustiaretur in me anima mea, Domini recordatus sum : ut veniat ad te oratio mea, ad templum sanctum tuum.

  9. IX

    Qui custodiunt vanitates frustra, misericordiam suam derelinquunt.

  10. X

    Ego autem in voce laudis immolabo tibi : quæcumque vovi, reddam pro salute Domino.

  11. XI

    Et dixit Dominus pisci, et evomuit Jonam in aridam.