Iob
Caput XLI
- I
Non quasi crudelis suscitabo eum : quis enim resistere potest vultui meo ?
- II
Quis ante dedit mihi, ut reddam ei ? omnia quæ sub cælo sunt, mea sunt.
- III
Non parcam ei, et verbis potentibus, et ad deprecandum compositis.
- IV
Quis revelabit faciem indumenti ejus ? et in medium oris ejus quis intrabit ?
- V
Portas vultus ejus quis aperiet ? per gyrum dentium ejus formido.
- VI
Corpus illius quasi scuta fusilia, compactum squamis se prementibus.
- VII
Una uni conjungitur, et ne spiraculum quidem incedit per eas.
- VIII
Una alteri adhærebit, et tenentes se nequaquam separabuntur.
- IX
Sternutatio ejus splendor ignis, et oculi ejus ut palpebræ diluculi.
- X
De ore ejus lampades procedunt, sicut tædæ ignis accensæ.
- XI
De naribus ejus procedit fumus, sicut ollæ succensæ atque ferventis.
- XII
Halitus ejus prunas ardere facit, et flamma de ore ejus egreditur.
- XIII
In collo ejus morabitur fortitudo, et faciem ejus præcedit egestas.
- XIV
Membra carnium ejus cohærentia sibi : mittet contra eum fulmina, et ad locum alium non ferentur.
- XV
Cor ejus indurabitur tamquam lapis, et stringetur quasi malleatoris incus.
- XVI
Cum sublatus fuerit, timebunt angeli, et territi purgabuntur.
- XVII
Cum apprehenderit eum gladius, subsistere non poterit, neque hasta, neque thorax :
- XVIII
reputabit enim quasi paleas ferrum, et quasi lignum putridum æs.
- XIX
Non fugabit eum vir sagittarius : in stipulam versi sunt ei lapides fundæ.
- XX
Quasi stipulam æstimabit malleum, et deridebit vibrantem hastam.
- XXI
Sub ipso erunt radii solis, et sternet sibi aurum quasi lutum.
- XXII
Fervescere faciet quasi ollam profundum mare, et ponet quasi cum unguenta bulliunt.
- XXIII
Post eum lucebit semita : æstimabit abyssum quasi senescentem.
- XXIV
Non est super terram potestas quæ comparetur ei, qui factus est ut nullum timeret.
- XXV
Omne sublime videt : ipse est rex super universos filios superbiæ.