Iob

Caput XXXV

  1. I

    Igitur Eliu hæc rursum locutus est :

  2. II

    Numquid æqua tibi videtur tua cogitatio, ut diceres : Justior sum Deo ?

  3. III

    Dixisti enim : Non tibi placet quod rectum est : vel quid tibi proderit, si ego peccavero ?

  4. IV

    Itaque ego respondebo sermonibus tuis, et amicis tuis tecum.

  5. V

    Suspice cælum, et intuere : et contemplare æthera quod altior te sit.

  6. VI

    Si peccaveris, quid ei nocebis ? et si multiplicatæ fuerint iniquitates tuæ, quid facies contra eum ?

  7. VII

    Porro si juste egeris, quid donabis ei ? aut quid de manu tua accipiet ?

  8. VIII

    Homini qui similis tui est, nocebit impietas tua : et filium hominis adjuvabit justitia tua.

  9. IX

    Propter multitudinem calumniatorum clamabunt, et ejulabunt propter vim brachii tyrannorum.

  10. X

    Et non dixit : Ubi est Deus qui fecit me, qui dedit carmina in nocte ;

  11. XI

    qui docet nos super jumenta terræ, et super volucres cæli erudit nos ?

  12. XII

    Ibi clamabunt, et non exaudiet, propter superbiam malorum.

  13. XIII

    Non ergo frustra audiet Deus, et Omnipotens causas singulorum intuebitur.

  14. XIV

    Etiam cum dixeris : Non considerat : judicare coram illo, et expecta eum.

  15. XV

    Nunc enim non infert furorem suum, nec ulciscitur scelus valde.

  16. XVI

    Ergo Job frustra aperit os suum, et absque scientia verba multiplicat.