Iob

Caput XXXII

  1. I

    Omiserunt autem tres viri isti respondere Job, eo quod justus sibi videretur.

  2. II

    Et iratus indignatusque est Eliu filius Barachel Buzites, de cognatione Ram : iratus est autem adversum Job, eo quod justum se esse diceret coram Deo.

  3. III

    Porro adversum amicos ejus indignatus est, eo quod non invenissent responsionem rationabilem, sed tantummodo condemnassent Job.

  4. IV

    Igitur Eliu expectavit Job loquentem, eo quod seniores essent qui loquebantur.

  5. V

    Cum autem vidisset quod tres respondere non potuissent, iratus est vehementer.

  6. VI

    Respondensque Eliu filius Barachel Buzites, dixit : Junior sum tempore, vos autem antiquiores : idcirco, demisso capite, veritus sum vobis indicare meam sententiam.

  7. VII

    Sperabam enim quod ætas prolixior loqueretur, et annorum multitudo doceret sapientiam.

  8. VIII

    Sed, ut video, spiritus est in hominibus, et inspiratio Omnipotentis dat intelligentiam.

  9. IX

    Non sunt longævi sapientes, nec senes intelligunt judicium.

  10. X

    Ideo dicam : Audite me : ostendam vobis etiam ego meam sapientiam.

  11. XI

    Expectavi enim sermones vestros ; audivi prudentiam vestram, donec disceptaremini sermonibus ;

  12. XII

    et donec putabam vos aliquid dicere, considerabam : sed, ut video, non est qui possit arguere Job, et respondere ex vobis sermonibus ejus.

  13. XIII

    Ne forte dicatis : Invenimus sapientiam : Deus projecit eum, non homo.

  14. XIV

    Nihil locutus est mihi : et ego non secundum sermones vestros respondebo illi.

  15. XV

    Extimuerunt, nec responderunt ultra, abstuleruntque a se eloquia.

  16. XVI

    Quoniam igitur expectavi, et non sunt locuti : steterunt, nec ultra responderunt :

  17. XVII

    respondebo et ego partem meam, et ostendam scientiam meam.

  18. XVIII

    Plenus sum enim sermonibus, et coarctat me spiritus uteri mei.

  19. XIX

    En venter meus quasi mustum absque spiraculo, quod lagunculas novas disrumpit.

  20. XX

    Loquar, et respirabo paululum : aperiam labia mea, et respondebo.

  21. XXI

    Non accipiam personam viri, et Deum homini non æquabo.

  22. XXII

    Nescio enim quamdiu subsistam, et si post modicum tollat me factor meus.