Iob

Caput III

  1. I

    Post hæc aperuit Job os suum, et maledixit diei suo,

  2. II

    et locutus est :

  3. III

    Pereat dies in qua natus sum, et nox in qua dictum est : Conceptus est homo.

  4. IV

    Dies ille vertatur in tenebras : non requirat eum Deus desuper, et non illustretur lumine.

  5. V

    Obscurent eum tenebræ et umbra mortis ; occupet eum caligo, et involvatur amaritudine.

  6. VI

    Noctem illam tenebrosus turbo possideat ; non computetur in diebus anni, nec numeretur in mensibus.

  7. VII

    Sit nox illa solitaria, nec laude digna.

  8. VIII

    Maledicant ei qui maledicunt diei, qui parati sunt suscitare Leviathan.

  9. IX

    Obtenebrentur stellæ caligine ejus ; expectet lucem, et non videat, nec ortum surgentis auroræ.

  10. X

    Quia non conclusit ostia ventris qui portavit me, nec abstulit mala ab oculis meis.

  11. XI

    Quare non in vulva mortuus sum ? egressus ex utero non statim perii ?

  12. XII

    Quare exceptus genibus ? cur lactatus uberibus ?

  13. XIII

    Nunc enim dormiens silerem, et somno meo requiescerem

  14. XIV

    cum regibus et consulibus terræ, qui ædificant sibi solitudines ;

  15. XV

    aut cum principibus qui possident aurum, et replent domos suas argento ;

  16. XVI

    aut sicut abortivum absconditum non subsisterem, vel qui concepti non viderunt lucem.

  17. XVII

    Ibi impii cessaverunt a tumultu, et ibi requieverunt fessi robore.

  18. XVIII

    Et quondam vincti pariter sine molestia, non audierunt vocem exactoris.

  19. XIX

    Parvus et magnus ibi sunt, et servus liber a domino suo.

  20. XX

    Quare misero data est lux, et vita his qui in amaritudine animæ sunt :

  21. XXI

    qui expectant mortem, et non venit, quasi effodientes thesaurum ;

  22. XXII

    gaudentque vehementer cum invenerint sepulchrum ?

  23. XXIII

    viro cujus abscondita est via et circumdedit eum Deus tenebris ?

  24. XXIV

    Antequam comedam, suspiro ; et tamquam inundantes aquæ, sic rugitus meus :

  25. XXV

    quia timor quem timebam evenit mihi, et quod verebar accidit.

  26. XXVI

    Nonne dissimulavi ? nonne silui ? nonne quievi ? et venit super me indignatio.