ad Ephesios

Caput VI

  1. I

    Filii, obedite parentibus vestris in Domino : hoc enim justum est.

  2. II

    Honora patrem tuum, et matrem tuam, quod est mandatum primum in promissione :

  3. III

    ut bene sit tibi, et sis longævus super terram.

  4. IV

    Et vos patres, nolite ad iracundiam provocare filios vestros : sed educate illos in disciplina et correptione Domini.

  5. V

    Servi, obedite dominis carnalibus cum timore et tremore, in simplicitate cordis vestri, sicut Christo :

  6. VI

    non ad oculum servientes, quasi hominibus placentes, sed ut servi Christi, facientes voluntatem Dei ex animo,

  7. VII

    cum bona voluntate servientes, sicut Domino, et non hominibus :

  8. VIII

    scientes quoniam unusquisque quodcumque fecerit bonum, hoc recipiet a Domino, sive servus, sive liber.

  9. IX

    Et vos domini, eadem facite illis, remittentes minas : scientes quia et illorum et vester Dominus est in cælis : et personarum acceptio non est apud eum.

  10. X

    De cetero, fratres, confortamini in Domino, et in potentia virtutis ejus.

  11. XI

    Induite vos armaturam Dei, ut possitis stare adversus insidias diaboli :

  12. XII

    quoniam non est nobis colluctatio adversus carnem et sanguinem, sed adversus principes, et potestates, adversus mundi rectores tenebrarum harum, contra spiritualia nequitiæ, in cælestibus.

  13. XIII

    Propterea accipite armaturam Dei, ut possitis resistere in die malo, et in omnibus perfecti stare.

  14. XIV

    State ergo succincti lumbos vestros in veritate, et induti loricam justitiæ,

  15. XV

    et calceati pedes in præparatione Evangelii pacis,

  16. XVI

    in omnibus sumentes scutum fidei, in quo possitis omnia tela nequissimi ignea extinguere :

  17. XVII

    et galeam salutis assumite, et gladium spiritus (quod est verbum Dei),

  18. XVIII

    per omnem orationem et obsecrationem orantes omni tempore in spiritu : et in ipso vigilantes in omni instantia et obsecratione pro omnibus sanctis :

  19. XIX

    et pro me, ut detur mihi sermo in apertione oris mei cum fiducia, notum facere mysterium Evangelii :

  20. XX

    pro quo legatione fungor in catena, ita ut in ipso audeam, prout oportet me loqui.

  21. XXI

    Ut autem et vos sciatis quæ circa me sunt, quid agam, omnia vobis nota faciet Tychicus, carissimus frater, et fidelis minister in Domino :

  22. XXII

    quem misi ad vos in hoc ipsum, ut cognoscatis quæ circa nos sunt, et consoletur corda vestra.

  23. XXIII

    Pax fratribus, et caritas cum fide a Deo Patre et Domino Jesu Christo.

  24. XXIV

    Gratia cum omnibus qui diligunt Dominum nostrum Jesum Christum in incorruptione. Amen.