Apocalypsis

Caput XX

  1. I

    Et vidi angelum descendentem de cælo, habentem clavem abyssi, et catenam magnam in manu sua.

  2. II

    Et apprehendit draconem, serpentem antiquum, qui est diabolus, et Satanas, et ligavit eum per annos mille :

  3. III

    et misit eum in abyssum, et clausit, et signavit super illum ut non seducat amplius gentes, donec consummentur mille anni : et post hæc oportet illum solvi modico tempore.

  4. IV

    Et vidi sedes, et sederunt super eas, et judicium datum est illis : et animas decollatorum propter testimonium Jesu, et propter verbum Dei, et qui non adoraverunt bestiam, neque imaginem ejus, nec acceperunt caracterem ejus in frontibus, aut in manibus suis, et vixerunt, et regnaverunt cum Christo mille annis.

  5. V

    Ceteri mortuorum non vixerunt, donec consummentur mille anni. Hæc est resurrectio prima.

  6. VI

    Beatus, et sanctus, qui habet partem in resurrectione prima : in his secunda mors non habet potestatem : sed erunt sacerdotes Dei et Christi, et regnabunt cum illo mille annis.

  7. VII

    Et cum consummati fuerint mille anni, solvetur Satanas de carcere suo, et exibit, et seducet gentes, quæ sunt super quatuor angulos terræ, Gog, et Magog, et congregabit eos in prælium, quorum numerus est sicut arena maris.

  8. VIII

    Et ascenderunt super latitudinem terræ, et circuierunt castra sanctorum, et civitatem dilectam.

  9. IX

    Et descendit ignis a Deo de cælo, et devoravit eos : et diabolus, qui seducebat eos, missus est in stagnum ignis, et sulphuris, ubi et bestia

  10. X

    et pseudopropheta cruciabuntur die ac nocte in sæcula sæculorum.

  11. XI

    Et vidi thronum magnum candidum, et sedentem super eum, a cujus conspectu fugit terra, et cælum, et locus non est inventus eis.

  12. XII

    Et vidi mortuos, magnos et pusillos, stantes in conspectu throni, et libri aperti sunt : et alius liber apertus est, qui est vitæ : et judicati sunt mortui ex his, quæ scripta erant in libris, secundum opera ipsorum :

  13. XIII

    et dedit mare mortuos, qui in eo erant : et mors et infernus dederunt mortuos suos, qui in ipsis erant : et judicatum est de singulis secundum opera ipsorum.

  14. XIV

    Et infernus et mors missi sunt in stagnum ignis. Hæc est mors secunda.

  15. XV

    Et qui non inventus est in libro vitæ scriptus, missus est in stagnum ignis.